KASALLIK

Bo'lmachalar titrashi (treteri)

Bo'lmachalar titrashi — bo'lmachalar bir daqiqada 250-350 marta muntazam ravishda qisqaradigan aritmiya. Yurak urishi ko'pincha tez (140-150 zarba/daq) bo'ladi. Bemor yurak tez urishini, hansirashni, ko'krak qafasida noqulaylik, charchoq yoki bosh aylanishini sezadi. Ba'zi hollarda belgilarsiz kechadi. Sabablari va xavflari bo'lmachalar fibrilyatsiyasiga o'xshash: gipertoniya, yurak nuqsonlari, o'pka kasalliklari, ortiqcha vazn. Tromb hosil bo'lib insultga olib kelishi mumkin. Tashxis EKG yordamida tasdiqlanadi. Davo: ritmni nazorat qilish (dorilar yoki kardioversiya), antikoagulyantlar, ko'pincha radiochastotali kateterli ablatsiya — bu usul juda samarali va kasallikni butunlay yo'qotishi mumkin.